【Now.com】George歐鎮灝@P1X3L今年首支solo派台作品《出甚麼風頭》昨晚（26日）上架。他亦是組合「P1X3L」跟唱片公司完約後首位推出solo作品的成員。今次George不但親自向偶像周柏豪邀歌，更成功打動柏豪跟合作無間的周錫漢及陳詠謙，齊齊擔任歌曲監製及歌詞操刀、Dick Wong編曲，幕後陣容絕對星級。
親自邀歌 周柏豪爽快答應
講到同偶像合作，George提起時仍難掩興奮：「其實醖釀咗成年，上年同同事講好想有首周生寫嘅歌，點知佢好好哋幫我問，周生仲一口答應：『冇問題！幫你寫！』好快就寫好呢首歌。」George又透露，寫歌前跟柏豪見過一面，提到過去一年屋企及人生經歷，對方即時心領神會：「佢好快get到我想要啲乜，錄音時仲坐喺隔離俾信心我，我真係好幸運。」
MV電影感十足 Yoyo謝咏欣捱打冇怨言
這次MV找來「第42屆香港電影金像獎」中獲得「最佳新演員」的Yoyo謝咏欣任女主角，George大讚對方「專業到嚇親人」：「同事推介Yoyo，因為上年金像獎我哋有一齊行過紅地氈，同埋我好鍾意睇佢套作品《但願人長久》，覺得：『嘩！年紀輕輕就已經可以咁架輕就熟。』非常之讚嘆同驚訝。跟住就膽粗粗地邀請佢拍呢個MV，佢都係非常之好，一口答應。」而且Yoyo更十分搏命：「MV有動作場面，要訓練同捱打，排戲時次次都要撻落地，但佢都話『冇事！再嚟吖！』我真係好respect佢！」
歌曲藏傷感回憶 提醒珍惜眼前人
《出甚麼風頭》歌詞其實藏着George心事：「上年有至親離開，先發覺時間唔係想像中咁多。好多說話可能未講出口，人就走咗……所以想話俾大家知，要珍惜同屋企人相處嘅時間。」George又指錄音時有柏豪跟周錫漢坐鎮，整個氣氛都好安心：「佢哋不停鼓勵我，周生仲唱埋demo，我聽完先發覺⋯⋯ 原來唱歌真係好難㗎！哈哈！」
